Суперкомпьютер Ўзбекистоннинг Осиё кубогида ғолиб чиқиш имкониятини баҳолади
Қатар мезбонлик қилаётган футбол бўйича Осиё кубоги бошланмоқда. Бу галги мусобақада қитъамизнинг энг кучли 24 мамлакати терма жамоалари ғолиблик учун курашади.
Осиё футбол конфедерацияси томонидан ташкил этилаётган мусобақа қоидасига кўра, олтита гуруҳда дастлабки икки поғонани эгаллаган ва энг яхши кўрсаткичга эга тўртта учинчи ўрин соҳиблари плей-офф босқичида курашни давом эттиради.
Қитъанинг энг нуфузли футбол турнири бошланиши арафасида таҳлилчилар, экспертлар, мутахассислар иштирокчиларнинг ғолиблик йўлидаги имкониятлари, қайси футболчилар порлаши мумкинлиги каби маълумотларни тақдим этмоқда.
Opta статистик платформасининг суперкомпьютер Қатардаги Осиё кубоги иштирокчиларининг ғолиб бўлиш имкониятларини баҳолади.
Сунъий интеллектнинг махсус алгоритмга асосланган ҳисоб-китобига кўра, қитъа чемпионатида ғолиб чиқишга асосий даъвогар сифатида Япония миллий терма жамоаси кўрсатилган. Таркиби асосан Европанинг кучли лигаларида ўйнаётган ўйинчилардан шакллантирилган Япониянинг мусобақада ғолиб чиқиш имконияти 24,6 фоизга баҳоланди.
Европа лигалари ва миллий чемпионатларда фаоллик кўрсатаётган ўйинчилар уйғунлигига асосланган Жанубий Корея терма жамоасининг чемпионлик салоҳияти 14,3 фоизни ташкил қилмоқда.
Жисмонан кучли футболчилардан таркиб топган Эрон миллий терма жамоаси бу кўрсаткичлар бўйича учинчи ўринда. Форсларнинг чемпионлик имконияти 11,2 фоизга тенг.
Амалдаги Осиё чемпионлари, яъни қатарликлар совринни ўзида сақлаб қолиши суперкомпюьтер томонидан 9,8 фоизга баҳоланди.
Қатарликлардан олдинги ўринларда Австралия (10,7 фоиз) ҳамда Саудия Арабистони (10,6 фоиз) терма жамоалари қайд этилган.
Opta статистик платформасига тегишли сунъий интеллект Ўзбекистон миллий терма жамоасининг Осиё кубогида ғолиб чиқиш имкониятини 2,5 фоизга тенглигини кўрсатди.
Ҳамюртларимизнинг қитъа чемпионатидаги энг юқори натижаси 2011 йили қайд этилган. Ўшанда футболчиларимиз мусобақанинг ярим финалигача етиб борган ва чемпионатни тўртинчи ўринда якунлаган.
Умуман олганда, Ўзбекистон миллий терма жамоаси шу пайтга қадар 17 маротаба ўтказилган минтақавий турнирда етти марта қатнашган.
Мустақилликни қўлга киритганидан кейин чемпионатда узлуксиз иштирок этиб келаётган бош жамоамиз умумий кўрсаткичлар бўйича 10-ўринда. Осиё чемпионатининг финал қисмида футболчиларимиз 28 та учрашув ўтказиб, 13 та ғалаба, тўртта дуранг, 11 та мағлубият қайд этган. Тўплар нисбати 42:45.
Адолат юзасидан айтиш жоизки, умумий рейтингда Ўзбекистон миллий терма жамоасидан юқорида турган тўққизта жамоа мусобақада камида тўққиз маротаба қатнашган. Хусусан, мусобақа мезбони – Қатар биздан бир поғона юқорида турибди. Қатарликлар Осиё кубогида 10 маротаба қатнашиб, 39 та беллашувда майдонга тушган. Ғалабалар сони Ўзбекистонники билан тенг – 13 та. Улар яна 11 та дуранг ва 15 мағлубият қайд этган.
Осий чемпионатида энг кўп иштирок этган терма жамоалар Эрон ва Жанубий Кореядир. Улар 17 марта ташкил қилинган мусобақадан 14 тасида қатнашган.
Турнир тўпурари ҳам эронлик Али Дайи. У қитъа чемпионатларида рақиблар дарвозасини 14 маротаба ишғол қилган.
Рекордчилар орасида Ўзбекистон миллий терма жамоаси дарвозабони Игнатий Нестеров ҳам тилга олинади. Тажрибали посбонимиз бешта Осиё чемпионатида қатнашган ягона футболчи сифатида рекорд ўрнатган.
Ўзбекистон миллий терма жамоасининг мусобақадаги тўпурари Александ Гейнрих бўлган. Креатив ҳужумчимиз турнирларда ўз ҳисобига олтита гол ёздириб қўйган.
Ниҳоят, Осиё кубогига энг кўп эга чиққан миллий терма жамоа Япониядир. Кунчиқар юрт вакиллари тўрт маротаба бош соврин соҳиби бўлган.
Фикрлар