Икки футболчимизнинг Қатардаги ўйинини испанияликлар кузатади!
Қатар қитъанинг энг кучли 24 терма жамоасини жамлади. Қитъанинг энг кучли ўйинчиларини жамлаган терма жамоалар Осиё кубоги учун курашни бошлади.
Спорт оламидаги нуфузли манба – Испаниянинг as.com сайти Осиё кубогида иштирок этаётган ва яқин келажакда машҳур футболчиларга айланиши кутилаётган энг иқтидорли чарм тўп усталарини танлаб, уларга баҳо берди.
AS нашри экспертлари футбол жамоатчилигини осиёлик истеъдод эгаларига эътибор қаратишга чақирди.
- Энг муҳими, нуфузли нашр мутахассислари Ўзбекистон миллий терма жамоаси ҳужумкор футболчиси Аббосбек Файзуллаев ўйинларини кузатишни ҳам тавсия қилди. Шунингдек, испанияликлар “Ланс”да ўйнаётган Абдуқодир Ҳусановнинг салоҳияти билан ҳам яхши таниш экани сайтда ёзилган таърифдан маълум бўлди.
Аббосек Файзуллаев – одатда, чап қанотда ўйнайдиган ўнақай футболчи. У марказий ҳимоячи Абдуқодир Ҳусанов билан бирга Ўзбекистоннинг энг катта янги юлдузлари ҳисобланади. Аббосбек Абдуқодир “Ланс”га ўтгани каби Европа клубига қўшилди. Аниқроқ айтганда, ЦСКАдан қўним топди.
Файзуллаев жуда сифатли ҳужумкор футболчи, ҳар қайси қанотда ҳам рақиб дарвозасига катта хавф сола олади, - деб ёзди as.com сайти.
Таъкидлаш жоизки, испан нашри тарқатган мақолада Осиё кубогининг энг иқтидорли футболчилари қаторига Аббосбек Файзуллаев ва Абдуқодир Ҳусановдан ташқари Тожикистон, Австралия, Япония, Ироқ, Жанубий Корея, Саудия Араьистони ва Қирғизистон терма жамоаларининг жами саккиз нафар иқтидорли ёш ўйинчилари киритилган.
Эслатиб ўтамиз, 2023 йилнинг август ойида “Пахтакор”дан ЦСКАга кўчиб ўтган Аббосбек Файзуллаев ЦСКА таркибида юқори савияда тўп тепяпти. 20 ёшли легионеримиз Премьер-лиганинг энг ёрқин кашфиёти сифатида эътироф этилди.
Кўпчилик мутахассислар Аббосбек Файзуллаев Россияда узоқ ушланиб қолмаслигини ва Европанинг кучли лигаларига йўл олишини таъкидламоқда.
Аббосбек Файзуллаевнинг ўзи болалигидан “Барселона”да ўйнаш орзуси борлигини, Лионель Мессининг мухлиси эканини эътироф этган.
Ҳамюртимизнинг ўйин услуби билан яхши таниш бўлган мутахассислар уни испан футболига мос тушиши ҳақида ўз фикрларини билдириб ўтган эди.
Аббосбек Файзуллаев 2023 йили Абдуқодир Ҳусанов билан бирга Ўзбекистон U20 терма жамоаси сафида ёшлар ўртасидаги Осиё чемпионатида ғолиб чиқди. Аббос бу мусобақанинг энг яхши футболчиси, деб топилди.
Кейин бу терма жамоа Аргентинада ўтказилган жаҳон чемпионатида ҳам жуда яхши қатнашди. Футболчиларимизнинг халқаро майдондаги муваффақиятлари Абдуқодир Ҳусановнинг Францияга кетишига йўл очди.
Энди кучли бешлик лигаларига бориш Аббосбек Файзуллаевнинг навбати. Бунинг учун 20 ёшли ҳужумкор футболчимиз Қатар майдонларида нималарга қодирлигини намойиш қилиши керак.
Фикрлар